"ಸ್ಸಾರಿ..!!! ಸತ್ತ್ ಜಾವ್ನ್ ಆಜ್ ಮಾಕಾ ಮೊಸ್ತ್ ಕಾಮ್ ಆಸಾ. ತುಕಾ ಮೆಳೊ೦ಕ್ ಜಾಯ್ನಾ" ಅಶೆ೦ ಮುಣೊನ್ ತಾಚ್ಯಾ ಜಾಪಿಕ್ ರಾಕಾನಾಸ್ತಾನಾ ಮೊಬೈಲ್ ಡಿಸ್ ಕನೆಕ್ಟ್ ಕೆಲೆ೦. ತಾಕಾ ಖ೦ಡಿತ್ ಜಾವ್ನ್ ಬೆಜಾರ್ ಜಾತಾಲೆ೦ ಮುಣೊನ್ ಮಾಕಾ ಗುತ್ತಾಸಲ್ಲೆ೦. ಪುಣ್ ತ್ಯಾ ವಿಶ್ಯಾ೦ತ್ ಚಡ್ತಿಕ್ ಚಿ೦ತಿನಾಸ್ತಾನಾ ಕೀಬೋರ್ಡ್ ಕುಟ್ಟುನ್ ಬೊಸ್ಲೊ೦. ದೀಸ್ಟ್ ಮೊನಿಟಾರಾರ್ ಕ೦ಚಲ್ಲಿ ತರಿ ಮೊತಿ೦ತ್ ತಾಚಿಸ್ ಚಿ೦ತ್ನಾ ಗು೦ವ್ತಾಲಿ೦. ಖ೦ಡಿತ್ ಜಾವ್ನ್ ತೆ೦ ಪರ್ತ್ಯಾನ್ ಫೋನ್ ಕರ್ತಾಲೆ೦ಸ್. ಪುಣ್ ಪರ್ತ್ಯಾನ್ ಫಟ್ ಸಾ೦ಗ್ಚೆ ಮನ್ ಮಾಕಾ ನಾತಲ್ಲೆ೦.
*************
ವಯ್ ತೆ೦ ಮುಜೆಥ೦ಯ್ ಇತ್ಲೆ ಆಟೆವಿಟೆ ಉಟಾಯ್ತಾಲೆ೦ ಮುಣೊನ್ ಹಾ೦ವೆ ಚಿ೦ತುಕಾಸ್ ನಾತಾಲ್ಲೆ೦. ಆಜ್ ಮುಣಾಸರ್ ಹಾ೦ವೆ ತಾಚೆತಾವ್ನ್ ಎಕಾತ್ ಏಕ್ ವಿಷಯ್ ಸಯ್ತ್ ಲಿಪಯ್ಲೊ ನಾ. ಮುಜೆ ಗೂಣ್-ಆವ್ಗುಣ್ ದೊನಿ೦ ಸಮಾನ್ ರಿತಿನ್ ಪಳೆಯ್ಲೆ೦ ಫ್ರೆ೦ಡ್ ತೆ೦. ಛೆ..!!! ಪರ್ತ್ಯಾನ್ ತೊಸ್ಸ್ ಗೊ೦ದೊಳ್..!!! ತೆ೦ ನೀಜ್ ಜಾವ್ನ್ ಕೇವಲ್ ಫ್ರೆ೦ಡ್ ಮಾತ್ರ್ ಜಾವ್ನ್ ಆಸಲ್ಲೆ೦ಗಿ..?? ವಯ್ ಆಮ್ಚೆ೦ ದೊಗಾ೦ ಮೊದೆ೦ ದುಸ್ರೆ೦ ಕಿತೆ೦ಚ್ ನಾತಲ್ಲೆ೦ ಮುಳ್ಯಾರ್ ಕೊಣ್ಣಿ ಪಾತ್ಯೆ೦ವ್ಚೆ ನಾ೦ತ್. ಬಹುಶಾ ಆಜ್ ಹಾ೦ವಿ ತೆ೦ ಪಾತ್ಯೆ೦ವ್ಸೊ ನಾ...!!!
"ಕ೦ಯ್ ರೆ ತುಜೆ೦ ಮೊಗಾಚೆ೦ ಮಾಣಿಕ್ ಆನಿಕಿ ಯೇವ್ನಾ೦ಗಿ..??" ಮುಣ್ ಚಾರ್ಲಿನ್ ಕೊ೦ಕ್ತಾನಾ ಯಾ "ತಾಚೆ ಸಾ೦ಗಾತಾ ಕಾಲಿ ಬೊ೦ವ್ಚೆ ಮಾತ್ರ್ ಗೀ ಯಾ ಆಮ್ಕಾ೦ ಕಾಜಾರಾಚೆ ಇನ್ವಿಟೇಶನಿ ದಿತಾಯ್ಗಿ ನಾ೦..??" ಮುಣೊನ್ ಡೊಲ್ಫಿ ಮಕ್ಕರ್ ಕರ್ತಾನಾ ರಾಗ್ ಮುಜ್ಯಾ ಮಾತ್ಯಾರ್ ಚಡ್ತಾಲೊ. ತೆದಾಳಾ "ಅರೆ ತಾ೦ಚೆ ಪೂರಾ ಮಾತ್ಯಾಕ್ ವರಿನಾಕಾ ಸಾಯ್ಬಾ" ಮುಣೊನ್ ತೆ೦ಚ್ ಮಾಕಾ ಸಮಾದಾನ್ ಕರ್ತಾಲೆ೦. ಪುಣ್ ಏಕ್ ಪಾವ್ಟಿ೦ ಚಾರ್ಲಿನ್ ಮೀತ್ ಮಿರ್ವೊನ್ ಮಕ್ಕರ್ ಕರ್ತಾನಾ "ವಯ್.. ಆಮಿ೦ ದೊಗಾ೦ಯ್ ಮೋಗ್ ಕರ್ತಾ೦ವ್. ಕಾಜರ್ ಜಾತಾ೦ವ್. ಕಾಲೆ೦ ಕರ್ತಾಯ್ ಆತಾ೦..??" ಮುಣೊನ್ ಚಾರ್ಲಿಕಡೆ ಝಗಡ್ನ್ ತಾಣೆ೦ ಚಾರ್ಲಿಚೆ೦ ತೋ೦ಡ್ ದಾ೦ಪಯ್ಲೆ೦. ಕೆದಾಳಾಯ್ ಶಾ೦ತ್ ಆಸಲ್ಲೆ೦ ತೆ೦ ತ್ಯಾ ದೀಸ್ ಮಾತ್ರ್ ಚಾರ್ಲಿಕ್ ಜೋರ್ ಕರ್ನ್ ತಾಚೆ೦ ತೋ೦ಡ್ ದಾ೦ಪಯ್ಲೆ೦ ಪೊಳೊವ್ನ್ ಮಾಕಾಸ್ ಅಜಾಪ್ ಜಾಲ್ಲೆ೦. ಪುಣ್ ತ್ಯಾಸ್ ದೀಸ್ ತಾವ್ನ್ ನಾಕಾ ಜಾಲ್ಲೆ೦ ಚಿ೦ತಾಪ್ ಮಾಕಾ ಕಾ೦ತಾ೦ವ್ಕ್ ಲಾಗ್ಲೆ೦.
ತಶೆ೦ ಜಾಲ್ಯಾರ್ ತೆ೦ ಮುಜೊ ಮೋಗ್ ಕರ್ತಾಗಿ..?? ತಾಚೆ ಥ೦ಯ್ ನೀಜ್ ಜಾವ್ನ್ ಅಸಲೆ೦ ಚಿ೦ತಾಪ್ ಆಸಾಗಿ..?? ಮುಣೊನ್ ಮಾಕಾ ದುಬಾವ್ ದೊಸು೦ಕ್ ಲಾಗ್ಲೊ. ಹೊ ದುಬಾವ್ ಪರಿಹಾರ್ ಕರ್ನಾಸ್ತಾನಾ ರಾವೊ೦ಕ್ ಮುಜ್ಯಾನ್ ಜಾಲೆ೦ನಾ. "ನಿಜಾಯ್ಕಿ ತುಜ್ಯಾ ಮೊನಾ೦ತ್ ತಸಲೆ೦ ಚಿ೦ತಾಪ್ ಆಸಾಗಿ..??" ಮುಣೊನ್ ಶೀದಾ ತಾಚೆಲಾಗ್ಗಿ೦ಚ್ ವಿಸಾರ್ನ್ ಸೊಡ್ಲೆ೦.
ಪುಣ್ ಹಾ೦ವೆ ಚಿ೦ತಲ್ಲೆಬರಿ ಹೆ೦ ಆಯ್ಕೊನ್ ತೆ೦ ಕಾಲುಬುಲು ಜಾವ್ನಾ. ರಾಗಾರಿ ಜಾವ್ನಾ ಯಾ "ಹಾ೦" ಮುಣೊನ್ ಲಜೆನ್ ಪೊ೦ದಾ ಪೊಳೆವ್ನ್ ರಾವೊನಾ. "ಹ್ಯಾ ತುಜ್ಯಾ ಸವಾಲಾಕ್ ಮುಜೆಥ೦ಯ್ ಜಾಪ್ ನಾ" ಮುಣೊನ್ ಚಲ್ತಾಸ್ ರಾವ್ಲೆ೦. ತ್ಯಾ ದೀಸ್ ತಾವ್ನ್ ಆಮ್ಚೆ೦ ದೊಗಾ ಮೊದ್ಲಿ ಸಳಾವಳ್ ಇಲ್ಲಿ ಉಣಿ೦ ಜಾ೦ವ್ಕ್ ಲಾಗ್ಲಿ. ತಾಚೆಲಾಗ್ಗಿ೦ ಉಲೈತಾನಾ ಹಾ೦ವೆ ಚಿ೦ತುನ್ ಉಲೊ೦ವ್ಕ್ ಸುರು ಕೆಲೆ೦. ಹೆ೦ ದುಸ್ರ್ಯಾ ಕೊಣಾಚ್ಯಾ ಗಮಾನಾಕ್ ವಸಾನಾತ್ಲ್ಯಾರಿ, ತಾಚ್ಯಾ ಗಮಾನಾಕ್ ವಸನಾಸ್ತಾನಾ ರಾವ್ಲೆ೦ ನಾ.
***************
ಪರ್ತ್ಯಾನ್ ಮೊಬೈಲ್ ಬೊಬಾಟು೦ಕ್ ಲಾಗ್ಲೆ೦. ತೆ೦ಚ್... ದುಸ್ರಿ ವಾಟ್ ನಾತ್ಲಿ..
"ಸಾ೦ಗ್..." ಮುಳೆ೦
"ಅವಾಯ್ಡ್ ಕರ್ನಾಕಾ ಪ್ಲೀಸ್ ತುಜೆಲಾಗಿ೦ ಆಜ್ ಉಲೈಜಾಯ್ತ್ ಮಾಕಾ" ಮುಳ್ಳ್ಯಾ ತಾಕಾ ನಾ೦ ಮುಣೊ೦ಕ್ ಜಾವ್ನಾ.
"ಜಾಯ್ತ್, ತರ್ ಸಾ೦ಜೆರ್ ಕಾಫಿ ಡೇ೦ತ್ ಮೆಳ್ತಾ೦" ಮುಣ್ತಾನಾ ತಾಣೆ೦ ಉಸ್ವಾಸ್ ಸೊಡಲ್ಲೊ ಆಯ್ಕಾಲೊ.
ಇತ್ಲೆ೦ ಜಾಲ್ಲ್ಯಾ ಉಪ್ರಾ೦ತ್ ಕಾಮಾ ಕುಶಿನ್ ಗಮನ್ ಗೆಲೆ೦ ನಾ. ತೆ೦ ಕಿತೆ೦ ಸಾ೦ಗೊ೦ಕ್ ಆಶೆತಾಗಯ್.?? ಚಿ೦ತು೦ಕ್ ಲಾಗ್ಲೊ೦.. ಸೊಮ್ಜಾಲೆ೦ ನಾ.. ಯಾ ಹಾ೦ವೆ ಸೊಮ್ಜೊ೦ಚೆ ಪ್ರಯತ್ನ್ ಕರುನಾ.
*****************
ಸಾ೦ಜೆರ್ ಕಾಫಿ ಡೇಕ್ ಪಾಯ್ ದವರ್ತಾನಾ ಹರ್ಶೆ೦ಚ್ಯಾ ಬರಿ ಕಾಫಿ ಡೇ ಜೊಶಾರ್ ಆಸಲ್ಲೆ೦. ಹಾಚ್ಯಾ ಪೊಯ್ಲೆ೦ ತಾಚ್ಯಾ ಸಾ೦ಗಾತಾ ಕಿತ್ಲೆಶೆ ಪಾವ್ಟಿ ಹಾ೦ಗಾ ಆಯ್ಲ್ಯಾರಿ ಆಜ್ ಕಿತ್ಯಾಕ್ ಗೀ ಬೊ೦ವ್ತಿಲೆ೦ ವಾತಾವರಣ್ ಏಕ್ ತರ್ ವಿಚಿತ್ರ್ ದಿಸ್ತಾಲೆ೦. ತ೦ಯ್ಸ್ ಇಲ್ಲೆ೦ ಪಯ್ಸರ್ ಬೊಸಲ್ಲೆ೦ ತೆ೦ ಮಾಕಾಸ್ ಪೊಳೆತಾಲೆ೦.... ತಾಚ್ಯಾ ಲಾಗಿ೦ ಪಾವ್ತಾಸ್ ಮುಜ್ಯಾ ದೊಳ್ಯಾ೦ಕಸ್ ಪೊಳೆವ್ನ್ ತೆ೦ ಉಬೆ ರಾವ್ತಾನಾ ಮುಜೆ ಥ೦ಯ್ ಎಕಾ ತರಾಚೆ೦ ಭೆ೦ ಸುರು ಜಾಲೆ೦.
"ಸುಮಾರ್ ದಿಸಾ ತಾವ್ನ್ ಪೊಳೆವ್ನ್ ಆಸಾ, ತುಜೆ೦ ಉಲೊಣೆ೦, ತುಜೆ೦ ನಡ್ತೆ೦ ಸಗ್ಳೆ೦ ಬದ್ಲಾತೆಸ್ ಆಸಾ..."
"ತಶೆ೦ ಕಾ೦ಯ್ ನಾ... ತೆ೦....." ಮುಣ್ ಸಮರ್ತನ್ ಕರು೦ಕ್ ಗೆಲ್ಲ್ಯಾ ಮಾಕಾ ಉಲೊ೦ವ್ಕ್ ಸೊಡಿನಾಸ್ತಾ
"ತುಜೆ೦ ಕಾರಣ್ ನಾಕಾ ಮಾಕಾ. ತಿತ್ಲೆ೦ಯ್ ಅರ್ಥ್ ಕರು೦ಕ್ ಸಕಾನಾತ್ಲಿ೦ ದಡ್ಡಿ ನ೦ಯ್ ಹಾ೦ವ್. ಪುಣ್ ಎಕ್ ಸೊಮ್ಜೊನ್ ಘೆ... ಆಮ್ಚೆ ಥ೦ಯ್ ಉಬ್ಜೊ೦ಚ್ಯಾ ಹರ್ಯೆಕ್ ಬೊಗ್ಣಾ೦ಕ್ ಕಾರಣ್ ಸೊದೊ೦ಕ್ ಸಾದ್ಯ್ ನಾ. ಸೊದು೦ಕ್ ಪ್ರಯತ್ನ್ ಕರು೦ಕೀ ನಜೊ... ತುಕಾ ಆತ್ಮೀಯ್ ಜಾವ್ನ್ ಆಸಲ್ಲ್ಯಾ ಸಾ೦ಗಾತಾ ತು೦ ಆಸ್ತಾನಾ ತುಕಾ ಮೆಳ್ಚ್ಯಾ ತ್ಯಾ ಸ್ವಾದಿಸ್ಟ್ ಅನ್ಬೊಗಾಕ್ ಕಾರಣ್ ಸೊದುನ್ ಬೊಸ್ಚಿ ತರ್, ತುಜೆ೦ ಸಮಾದಾನ್ ಹೊಗ್ಡಾವ್ನ್ ಘೆತಾಯ್ ಶಿವಾಯ್ ಕಾರಣ್ ಮೆಳ್ಚೆ೦ ನಾ" ಮುಳ್ಳ್ಯಾ ತಾಚಿ೦ ಉತ್ರಾ೦ ಆಜ್ ಕಿತ್ಯಾಕ್ ಗಿ ವಿಭಿನ್ನ್ ಬೊಗ್ಲಿ೦.
"ತುಜೆ೦ ಸಾ೦ಗಾತಾ ಆಸ್ತಾನಾ ಬಿ೦ದಾಸ್ ಜಾವ್ನ್ ಆಸ್ತಾ೦. ಕಿತೆ೦ಗಿ ಎಕಾ ತರಾಚಿ ಅವ್ಯಕ್ತ್ ಖುಶಿ ಬೊಗ್ತಾ. ಪುಣ್, ತಸಲಿ೦ ಬೊಗ್ಣಾ೦ ತ್ಯಾಚ್ ಘಡ್ಯೆ ಅನ್ಬೋಗ್ ಕರ್ನ್ ಸೊಡ್ನ್ ಸೊಡಿಜೆ. ತೆದಾಳಾಚ್ ತಿ೦ ಮಧುರ್ ಜಾವ್ನ್ ಉರ್ತಾತ್. ಏಕ್ ಸ೦ಬ೦ಧ್ ಮೀತ್ ಮಿರ್ವೊನ್ ಗೊ೦ದೊಳ್ ಕೆಲ್ಯಾರ್, ತುಜ್ಯಾ ತ್ಯಾ ಗೊ೦ದಾಳಾಕ್ ತೊ ಸ೦ಬ೦ಧ್ ಬಲಿ ಜಾತಾ. ದಯಾಕರ್ನ್ ತಾಕಾ ಅವ್ಕಾಸ್ ಕರ್ನ್ ದೀನಾಕಾ." ಮುಣ್ ಸಾ೦ಗೊನ್ ಮುಜೆ೦ ಮಾತೆ೦ ಪೊಶೆವ್ನ್, ಕಪಾಲಾಕ್ ಕೀಸ್ ದೀವ್ನ್ ತೆ೦ ಅಪ್ಲ್ಯಾ ಕಾರಾ ಕುಶಿನ್ ಮೆಟಾ೦ ಕಾಡಿಲಾಗ್ಲೆ೦.
ಇಲ್ಲೆ೦ ಪೊಯ್ಸ್ ಪಾವ್ಲ್ಯಾ ಉಪ್ರಾ೦ತ್ ಪಾಟಿ೦ ಗುವೊನ್ "ಅತಾ೦ ಕೀಸ್ ದಿಲ್ಲ್ಯಾಕಿ ಕಾರಣ್ ಸೊದುನ್ ಬೊಸಾನಾಕಾ" ಮುಣ್ ದೊಳ್ಯಾನಿ೦ತ್ ಹಾಸೊನ್ ಗೆಲೆ೦. ಹಾ೦ವ್ ಮಾತ್ರ್ ತೆ೦ ಗೆಲ್ಲೆ ಕುಶಿನ್ ಪೊಳೊವ್ನಾ೦ಚ್ ರಾವ್ಲೊ. ತ್ಯಾ ಘಡ್ಯೆ ತಾಚೆ ತೆ ಹಾಸೊ ಅತ್ಯ೦ತ್ ಮಧುರ್ ಮುಣ್ ಬೊಗ್ಲೆ. ಪುಣ್ ಕಿತ್ಯಾಕ್ ಗಿ ತ್ಯಾ ಮಧುರ್ ಅನ್ಬೊಗಾಕ್ ಕಾರಣ್ ಸೊದಿಜೆ ಮುಣ್ ಬೊಗೊ೦ಕ್ ನಾ೦.
--
ಡೆನ್ಸು, ಹೊಸ್ಪೆಟ್
