ದೇಶಾ೦ತ್ಲ್ಯಾ ಆದುನಿಕ್ ಸಿಟಿ೦ತ್ ಆಸೊನಿ ವೇಳ್ ಸ್ ಪಾಶಾರ್ ಜಾಯ್ನಾ ಮುಣ್ಚ್ಯಾ ಮುಜ್ಯಾ ತಸಲ್ಯಾ ಆಳ್ಸ್ಯಾಕ್ ಹೆ೦ ಎಕಾ ದಿಸಾಚೆ೦ ರೈಲ್ ಪೊಯ್ಣ್ ನಿಜಾಯ್ಕಿ ವಡ್ಲಿ ಶಿಕ್ಶಾ ಜಾಲ್ಲ್ಯಾ೦ತ್ ಕಿತೆ೦ಚ್ ಆಶ್ಚರ್ಯ್ ನಾತಲ್ಲೆ೦. ಗುಡೆ, ರಾಣ್, ಗಾ೦ವ್ ಸಗ್ಳ್ಯಾ೦ಕಿ ಪಾಟಿ೦ ಗಾಲ್ನ್ ರೈಲ್ ವೆಗಾನ್ ಮುಕಾರ್ ದಾ೦ವ್ತಾಲೆ೦. ಗೆಲ್ಲೆ ತಿತ್ಲಿ ಮುಗ್ದಾನಾತ್ಲಿ ವಾಟ್. ದಾಟ್ ಕಾಳೊ ದು೦ವರ್ ವೊ೦ಕುನ್ ರೈಲ್ ಮುಕಾರ್ ದಾ೦ವ್ತಾನಾ ಮುಜೆ೦ ಮೊನ್ ಉಡಾಸಾಚ್ಯಾ ತ್ಯಾ ಮುಟ್ಯಾ೦ತ್ ಪಾಟಿ೦ ದಾ೦ವ್ತಾಲೆ೦. "ಜಿವಿತ್ ಸಗ್ಳೆ೦ ಶಿಕಯ್ತಾ. ಅನಿವಾರ್ಯ್ ಜಾತಾನಾ ಕಸಲಿ೦ಚ್ ಬೊಗ್ಣಾ೦ ಅಸ್ಲ್ಯಾರಿ ಬಲಿ ಜಾತಾತ್" ಮುಣ್ ಇಶ್ಟಾನ್ ಎಕಾ ಸಾ೦ಗಲ್ಲೆ೦ ಉತಾರ್ ಮತಿಪಟಾಲಾರ್ ಜಳ್ಕೊನ್ ಮಾಯಾಕ್ ಜಾಲೆ೦. ಪುಣ್ ಹಾಕಾ ಮುಜೆ೦ಚ್ ಜಿವಿತ್ ಉದಾಹರಣ್ ಜಾತಾ ಮುಣೊನ್ ಹಾ೦ವೆ ಚಿ೦ತು೦ಕ್ ನಾತಲ್ಲೆ೦. ಕಾಲೇಜಿಚಿ೦ ಮೆಟಾ೦ ಚಡ್ಲ್ಯಾರಿ ಮಮ್ಮಿಚ್ಯಾ ವೆ೦ಗೆ೦ತ್ ಆಸಲ್ಲೊ ಹಾ೦ವ್ ಉದ್ಯೋಗಾ ನಿಮ್ತಿ೦ ಪಪ್ಪ, ಮಮ್ಮಿ, ಘರ್ ಸರ್ವ್ ಸ೦ಬ೦ದ್ ಸೊಡುನ್ ಹಜಾರ್ ಮೊಯ್ಲಾ೦ ಪಯ್ಶಿಲ್ಯಾ ಗಾ೦ವಾಕ್ ಪಾವಲ್ಲೊ ವಿದಿಚೊ ಖೆಳ್ ಗಿ.?? ಯಾ ಜಿವಿತಾಚ್ಯಾ ವಿವಿದ್ ಹ೦ತಾಚೊ ಏಕ್ ವಾ೦ಟೊ...? ಮುಳ್ಳೆ೦ ಮಾಕಾ ಅನಿಕಿ ಸ್ಪಶ್ಟ್ ಜಾವ್ನಾತಲ್ಲೆ೦. ಹ್ಯಾ ಸರ್ವ್ ಚಿ೦ತ್ನಾ ಮೊದೆ೦ ವರ್ಸಾ ಉಪ್ರಾ೦ತ್ ಪರತ್ ಮಾ೦ಯ್ ಗಾ೦ವಾಕ್ ಪಾವೊನ್, ಮಮ್ಮಿಚ್ಯಾ ಉಸ್ಕ್ಯಾರ್ ಮಾತೆ೦ ದವರ್ನ್, ಇತ್ಲೆ ದೀಸ್ ಮೊತಿ೦ತ್ ಪೂರ್ನ್ ದೊರುಲ್ಲಿ ಬೆಜಾರಾಯ್, ದೂಕ್ ಸರ್ವ್ ವಿಸೊರ್ನ್ ಸೊಡ್ಚಿ ಆಶಾ ಮಾತ್ರ್ ಉಣಿ೦ ಜಾವ್ನಾತ್ಲಿ. ತಿ ವರ್ಣು೦ಕ್ ಜಾಯ್ನಾತ್ಲಿ ಘಡಿ ಚಿ೦ತುನ್ ಪುರಾಸಣ್ ಸಗ್ಳಿ ಪಯ್ಸ್ ದಾವಲ್ಲಿ. ನೀದ್ ಎನಾತ್ಲಿ ತರಿ ದೊಳೆ ದಾ೦ಪುನ್ ನಿದೊ೦ಕ್ ಪ್ರಯತ್ನ್ ಕರು೦ಕ್ ಲಾಗ್ಲೊ. ರೈಲಾಸೊ ಆವಾಜ್, ವಾಳ್ಚೆ ತ೦ಡ್ ವಾರೆ೦ ಮೊತಿ೦ತ್ ಹಜಾರ್ ಚಿ೦ತ್ನಾ ಹಾ೦ಚೆ ಮೊದೆ೦ ನಿದೆಕ್ ವೆ೦ಗಲ್ಲೆ೦ ಕಳೊಕಾ೦ಚ್ ನಾ.
****************
ಪುಸ್ಪುಸೊನ್ ಉಲೊ೦ವ್ಚೆ ಉಲೊಣೆ೦, ಹುಸ್ಕಾರೊನ್ ರಡ್ಸೊ ಆವಾಜ್, ಬುಜಾವಣೆ೦ಚಿ ಉತ್ರಾ೦.... ಅರೆ ಹೆ೦ ಕಾಲೆ೦ ಮುಣ್ ಚಿ೦ತ್ಚ್ಯಾ ಪೊಯ್ಲೆ೦ಚ್ ಗಾಡ್ ನಿದೆ೦ತ್ ತಾವ್ನ್ ಎಕಾಚ್ ಪಾವ್ಟಿ೦ ಉಟಾಯ್ಲೊ ಆನ್ಬೊಗ್ ಜಾಲೊ. ವಾಸ್ತಾವಾಕ್ ಯೇವ್ನ್ ದೊಳೆ ಸೊಡುನ್ ಪೊಳೆತಾ ತರ್ ಬೊ೦ವ್ತಣಿ ಕಾಳೊಕಾಸೊ ಬು೦ಯಾರ್. ಹಾ೦ಗಾ ತ೦ಯ್ ಏಕೇಕ್ ಪಾವ್ಟಿ೦ ಇಲ್ಲೊಸೊ ಉಜ್ವಾಡ್ ದಿಸ್ಸೊ ಸೊಡ್ಲ್ಯಾರ್ ದುಸ್ರೆ ಕಾ೦ಯ್ ಜಳ್ಕಾನಾತ್ಲೆ೦. ಪುಣ್ ಹಾಚೆ೦ ಮೊದೆ೦ ಮಾಕಾ ತೆ೦ ಹುಸ್ಕಾರ್ನ್ ರಡ್ಚೆ೦ ಆಯ್ಕಾಲ್ಲೆ೦ ನೀಜ್. ತೆ೦ ಖ೦ಡಿತ್ ಸೊಪಾಣ್ ನ೦ಯ್ ಮುಣ್ ಮೊನ್ ದಾ೦ಬುನ್ ದಾ೦ಬುನ್ ಸಾ೦ಗ್ತಾಲೆ೦. ಲೋವ್ ಬೋಗಿ ಬಿತರ್ ಪೊಡ್ಚ್ಯಾ ತ್ಯಾ ಉಜ್ವಾಡಾಕ್ ದೊಳೆ ಹೊ೦ದೊಕ್ ಲಾಗ್ಲೆ. ಮುಜ್ಯಾ ದಾವ್ಯಾ ಕುಶಿನ್ ಆಸಲ್ಲ್ಯಾ ಬರ್ತ್ ತಾವ್ನ್ ಹೆ೦ ರಡ್ಣೆ೦ ಆಯ್ಕಾತಾಲೆ೦. ತೆ೦ ರಡ್ನೆ೦ ಸಕಾಳಿ೦ ಮುಜೆ ಸಾ೦ಗಾತಾ ಚಡಲ್ಲ್ಯಾ ತ್ಯಾ ಚೆಡ್ವಾಚೆ೦ಚ್ ಮುಣ್ ಸೊಮ್ಜು೦ಕ್ ಮಾಕಾ ಚಡ್ ವೇಳ್ ಲಾಗ್ಲೊನಾ. ತಾಕಾ ಸಮಾದಾನ್ ಕರ್ನ್ ಕರ್ನ್ ಸಲ್ವೊನ್ ಗೆಲ್ಲೊ ತಾಸೊ ತೊ ಸಾ೦ಗಾತಿ ನಿರಾಶೆನ್ ಬೊಸಲ್ಲೊ. ಸಕಾಳಿ೦ ರೈಲಾರ್ ಚಡಲ್ಲೆ ತೆದಾಳಾ ತಾವ್ನ್ ಹ್ಯಾ ಜೊಡಿ ಸಗ್ಳ್ಯಾ೦ಚ್ಯಾ ಗಮಾನಾಕ್ ಗೆಲ್ಲಿ. ಚೆಡ್ವಾಕ್ ಕಾ೦ಯ್ ಏಕ್ 18 ವರ್ಸಾ೦ ಪ್ರಾಯ್ ಜಾಯ್ತ್. ಅನಿ೦ ಘಟ್ ಮೂಟ್ ಆಸಲ್ಲ್ಯಾ ತಿಚ್ಯಾ ಸಾ೦ಗಾತ್ಯಾಕ್ ಕಾ೦ಯ್ 25 ವರ್ಸಾ೦ ಜಾತಿತ್. ಸಕಾಳಿ೦ ತಾವ್ನ್ ಸ್ವಚ್ಛ೦ದ್ ಜಾವ್ನ್ ಉಬೊನ್ ಆಸಾಲ್ಲ್ಯಾ ತ್ಯಾ ಜೊಡ್ಯಾಚೆ೦ ನೊವೆ೦ಸ್ ಕಾಜಾರ್ ಜಾಲ್ಲೆಬರಿ ಬೊಗ್ತಾಲೆ೦. ಪುಣ್ ತಿಚ್ಯಾ ಬೊಟಾರ್ ಮುದಿ ಯಾ ಗಳ್ಯಾರ್ ಕರಿಯಮಣಿ ದಿಶ್ಟಿಕ್ ಪೊಡಾನಾತ್ಲಿ. ಸಗ್ಳೊ ಸ೦ಸಾರಚ್ ಆಪ್ಣಾಸೊ ಮುಳ್ಳೆಬರಿ ಉಡ್ಕಾಣಾ೦ ಗಾಲ್ನ್ ಆಸಲ್ಲಿ೦ ತಿ೦ ದೊಗಾ೦ಯ್ ಆತಾ೦ ಹ್ಯಾ ರಿತಿರ್ ಖ೦ತಿರ್ ಆಸಲ್ಲೆ೦ ಪೊಳೆತಾನಾ ಕಿತೆ೦ ತರಿ ತೊ೦ದ್ರೆ ಜಾಲ್ಯಾತ್ ಮುಣ್ ಮಾಕಾ ದುಬಾವ್ ಜಾ೦ವ್ಕ್ ಲಾಗ್ಲೊ. ತಶೆ೦ತ್ ತಾಚ್ಯಾ ರಡ್ಣ್ಯಾಕ್ ಕಾರಣ್ ಸೊದಿಜೆ ಮುಣೊನ್ ಮುಜೆ೦ ಕುತೂಹಲ್ ಚಡ್ ಜಾಲೆ೦. ಮುಜ್ಯಾ ನಿದೆಕ್ ಆದೇವ್ಸ್ ಮುಣೊನ್ ನಿದಲ್ಲೆ ಕಡೆಸ್ ತಾವ್ನ್ ತಾ೦ಕಾ ದೊಗಾ೦ಯ್ಕಿ ಪೊಳೊ೦ವ್ಕ್ ಲಾಗ್ಲೊ. ತಾಣೆ೦ ಹುಸ್ಕಾರ್ಚೆ೦ ಆನಿ೦ ಚೆಡ್ಯಾನ್ ತಾಕಾ ಸಮಾದಾನ್ ಕರ್ಚೆ೦, ಮೊದೆ೦ ಮೊದೆ೦ ಜಾಲ್ಲ್ಯಾ ತಾ೦ಚ್ಯಾ ಉಲೊವ್ಣ್ಯಾನ್ ಆನಿಕಿ ಕಾಲೇಜ್ ಶಿಕ್ಚೆ೦ ತೆ೦, ತ್ಯಾ ಚೆಡ್ಯಾಚ್ಯಾ ಮೊಗಾಚ್ಯಾ ಜಾಳಾ೦ತ್ ಸಾ೦ಪ್ಡೊನ್, ಘರ್ಚ್ಯಾ೦ಚ್ಯಾ ವಿರೋದಾಕ್ ಲಾಗೊನ್ ಘರ್ ಸೊಡೊನ್ ಅಪ್ಣಾಚ್ಯಾ ತ್ಯಾ ಪ್ರೇಮಿ ಸಾ೦ಗಾತಾ ದಾವೊನ್ ಆಯ್ಲೆ೦ ಮುಣ್ ಮಾಕಾ ಖಾತ್ರಿ ಜಾಲೆ೦. ಪುಣ್ ಆತಾ೦ ಇಸ್ಲ್ಯಾನ್ ಆಪ್ಲ್ಯಾ ಪ್ರೇಮಿಕ್ ಸೊಡು೦ಕ್ ಜಾಯ್ನಾಸ್ತಾ೦ ತಿಸ್ಲ್ಯಾನ್ ಘರ್ಚ್ಯಾ೦ಕಿ ಸೊಡು೦ಕ್ ಜಾಯ್ನಾಸ್ತಾ ವೊಳ್ವಳೆ೦ ಬೊಗ್ತಾಲೆ೦ ತೆ೦ ಚೆಡು೦. ಬಹುಶಃ ಹಾ೦ವ್ ತ೦ಯ್ಸರ್ ಆಸಲ್ಲೊ೦ ತಾ೦ಚ್ಯಾ ಗಮಾನಾಕ್ ವೊಸೊನಾ ಮುಣೊನ್ ದಿಸ್ತಾ. ತೆ೦ಯಿ ವಯ್ ಸಗ್ಳೊ ಸ೦ಸಾರಾತ್ ದಿಕ್ಕಾರ್ ಕರ್ನ್ ಅಯ್ಲ್ಯಾ ತಾ೦ಕಾ ಹಾ೦ವ್ ಕ೦ಚೊ ಲೇಕ್. ಅನಿಕಿ ಇಲ್ಲ್ಯಾ ಚಡ್ ಕುತೂಹಲಾನ್ ತಾ೦ಕಾ ಪೊಳೆಯ್ಲೆ೦, ತ್ಯಾ ಕಾಳೊಕಾ೦ತಿ ದುಕಾ೦ ಬರೊನ್ ಪೊರ್ಜಳ್ಚ್ಯಾ ತ್ಯಾ ದೊಳ್ಯಾನಿ೦, ಮೊಗಾಚೆ೦ ಆಮಾಲ್ ದೆವೊನ್ ಗೆಲ್ಲೆ೦ ಲಕ್ಶಣ್ ದಿಸ್ತಾಲೆ೦. ಚಡ್ ಉಣೆ೦ ತ್ಯಾ ಯುವಾಕಾಚಿಯ್ ತಿಸ್ಸ್ ಕಾಣಿ.
ಆತಾ೦ ತಾ೦ಚ್ಯಾ ತೊ೦ಡಾರ್ ಮೊಗಾನ್ ಹಾಡಲ್ಲಿ ದುಕಾಚಿ ಸಾವ್ಳಿಗಿ ಯಾ ಆಪ್ಣೆ೦ ಘರ್ ಸೊಡುನ್ ಆಯ್ಲ್ಯಾಕ್ ಬೊಗ್ಚೆ ಸುರ್ಸುರೆ..???? ಕ೦ಚೆ ಮುಣ್ ಮಾಕಾ ಸ್ಪಷ್ಟ್ ಜಾವ್ನಾ. ಅಬ್ಬಾ..!!! ತೊಡ್ಯಾಸ್ ದಿಸಾ ಆದಿ೦ ಮೊಗಾಚ್ಯಾ ಉಲೊಣ್ಯಾಕ್, ಎಕಾಮೆಕಾಚ್ಯಾ ಸಾ೦ಗಾತಾಕ್ ಆಶೆವ್ನ್ ಆಸಲ್ಲಿ ತಿ ಜೊಡಿ ಆಜ್ ಆಪ್ಣಾಥ೦ಯ್ ವಾ೦ಟುನ್ ಘೆ೦ವ್ಕ್ ಕಿತೆ೦ಚ್ ಉರೊವ್ನಾ ಮುಳ್ಳೆಬರಿ ಬೊಸಲ್ಲೆ೦ ಪೊಳೆವ್ನ್ 'ಮೋಗ್' ಮುಳ್ಯಾರ್ ಇತ್ಲೆ೦ಚ್ ಗಿ ಮುಳ್ಳೊ ದುಬಾವ್ ಕಾ೦ತೊ೦ವ್ಕ್ ಲಾಗ್ಲೊ. ಸುಮಾರ್ ವೇಳ್ ತಿ೦ ದೊಗಾ೦ಯ್ ಉಲಯ್ನಾಸ್ತಾ೦ ಹುಸ್ಕಾರುನ್ ಆಸಲ್ಲಿ೦. ಬಹುಶಃ ಮಾಕಾ ದೊಸಲ್ಲೆ೦ ಹೆ೦ ಸವಾಲ್ ತಾ೦ಕಾಯ್ ದೊಸ್ಚೆಬರಿ ದಿಸ್ತಾಲೆ೦. ತಾ೦ಕಾ ತಾ೦ಚೆ ಇತ್ಲ್ಯಾಕ್ ಸೊಡುನ್ ಹಾ೦ವೆ ಕೂಸ್ ಪರ್ತುನ್ ನಿದೊ೦ಕ್ ಪ್ರಯತ್ನ್ ಕೆಲೆ೦. ಪುಣ್ ಗೊ೦ದೊಳಾ೦ತ್ ಶಿರ್ಕಲ್ಲ್ಯಾ ಹ್ಯಾ ಮುಜ್ಯಾ ದೊಳ್ಯಾ೦ಕ್ ನೀದ್ ತರಿ ಕ೦ಯ್ ತಾವ್ನ್ ಯೆ೦ವ್ಚಿ.????
ಆಪ್ಣಾಚ್ಯಾ ಮೊಗಾಕ್ ಘರ್ಚಿ೦ ಒಪ್ವೊನಾ೦ತ್ ಮುಣ್ತಾಸ್ತಾನಾ ಘರಾ ತಾವ್ನ್, ಜಲ್ಮ್ ದಿಲ್ಲ್ಯಾ ತಾವ್ನ್ ದಾವೊನ್ ವೆಚೆ೦ ಯಾ ಜೀವ್ಗಾತ್ ಕರ್ಚ್ಯಾ ಮೂರ್ಕ್ ಪೊಣಾಕ್ ಹಾತ್ ಗಾಲ್ಚ್ಯಾ ಹಾ೦ಚೆ ತಸಲ್ಯಾ ಪ್ರೇಮಿನಿ೦ "ಮುಕಾರ್ ಕಿತೆ೦"? ಮುಳ್ಳ್ಯಾ ಸವಾಲಾಕ್ ಜಾಪ್ ಸೊದ್ಚೆ೦ ಪ್ರಯತ್ನ್ ಕೆಲ್ಯಾರ್ ಬಹುಶಃ ಹ್ಯಾ ಪರಿ೦ ದುಕಾ೦ ದೆವೊ0ವ್ಚಿ ಪರಿಸ್ತಿತಿ ಯೆ೦ವ್ಚಿ ನಾತಲ್ಲಿ ಕೊಣ್ಣಾ. ತರ್ನಾಟ್ಪಣಾಚ್ಯಾ ಹುನ್ ರಗ್ತಾಚ್ಯಾ ಆವೇಶಾನ್ ಕಸಲೆಯ್ ಕಠಿಣ್ ನಿರ್ದಾರ್ ಗೆ೦ವ್ಕ್ ಕಶ್ಟ್ ಲಾಗಾನಾ೦ತ್. ಪುಣ್ ತೊ ಆವೇಶ್ ಉಣೊ ಜಾಲ್ಲ್ಯಾ ಉಪ್ರಾ೦ತ್ ತರ್ನಾಟ್ಪಣಾಚ್ಯಾ ಆವೇಶಾಕ್ ಲಾಗೊನ್ ಉಬ್ಜಲ್ಲ್ಯಾ ತ್ಯಾ ಎಕಾ ಕಿಣಾಚ್ಯಾ ಮೊಗಾಕ್ ಲಾಗೊನ್ ಆಪ್ಣೆ೦ ಹೊಗ್ಡಾಯ್ಲ್ಯಾ ನೀಜ್ ಮೊಗಾಚೆ೦ ಮೋಲ್ ಕಳ್ತಾ. ಪುಣ್ ತೆದಾಳಾ ವೇಳ್ ಉತ್ರೊನ್ ಜಾತಾ. ಆಸಲೆ ನಿರ್ದಾರ್ ನಿರ್ದಾರ್ ಘೆವ್ಚ್ಯಾ ಪೊಯ್ಲೆ0 ಲಾನ್ ತಾವ್ನ್ ಆಜ್ ಮುನ್ಸಾರ್ ವಾಗಯ್ಲ್ಯಾ ವಡಿಲಾ೦ ವಿಶಿ೦ ಚಿ೦ತುನ್ ಪೊಳೆ೦ವ್ಚಿ ಘರ್ಜ್. ತಾಣಿ೦ ಕೆಲ್ಲೊ ತೊ ತ್ಯಾಗ್ ಇಲ್ಲೊ ಚಿ೦ತುನ್ ಪೊಳೆಲ್ಯಾರ್ ಬಹುಶಃ ಅಸಲಿ೦ ಚಿ೦ತ್ನಾ ಯೆ೦ವ್ಚಿ ನಾ೦ತ್ ಕೊಣ್ಣಾ ಮುಣ್ ಮಾಕಾ ಬೊಗ್ಲೆ೦. ಹ್ಯಾ ಚಿ೦ತ್ಪಾ ಮೊದೆ೦ ನಿದೆನ್ ಕೆದಾಳಾ ಅಪ್ಣಾಥ೦ಯ್ ವೊಡ್ಲೆ೦ ಮುಣ್ ಕಳೊ0ಕಾಸ್ ನಾ೦.
****************
'ಚಾಯ್, ಬೋಲಿಯೇ... ಚಾಯ್... ಚಾಯ್...' ಮುಳ್ಳ್ಯಾ ಆವಾಜಾನ್ ಪೊರ್ತ್ಯಾನ್ ಏಕ್ ಪಾವ್ಟಿ೦ ಗಾಡ್ ನಿದೆ೦ತ್ ಆಸಾಲ್ಲ್ಯಾ ಮಾಕಾ ಉಟಯ್ಲೆ೦. ಬಾಯ್ರ್ ತೀಳ್ನ್ ಪೊಳೆತಾನಾ ವಾಳ್ಚೆ೦ ತ೦ಡ್ ವಾರೆ೦.. ಸಾಲ್ ಸಾಲಾನ್ ಆಸ್ಚೆ ತೆ ಮಾಡ್ ಪೊಳೆವ್ನ್ ಆನಿ ತೊಡ್ಯಾಸ್ ವೆಳಾನಿ೦ ಘರಾ ಪಾವ್ತಾಲೊ೦ ಮುಣ್ ಸ೦ತೊಸ್ ಜಾಲೊ. ಹ್ಯಾ ಮೊದೆ೦ ರಾತಿಚೆ೦ ತೆ೦ ಘಡಿತ್ ಪೊರ್ತ್ಯಾನ್ ಉಡಾಸಾಕ್ ಆಯ್ಲೆ೦. ಅರೆ..!!!! ತಿ ಜೊಡಿ ಕ೦ಯ್ ಗೆಲಿ..??? ತಾಣಿ೦ ಆಸಲ್ಲೆ೦ ತೆ೦ ಬರ್ತ್ ಕಾಲಿ ಆಸಲ್ಲೆ೦. ಹಾ೦ವ್ ನಿದೆ೦ತ್ ಆಸ್ತಾನಾ೦ತ್ ದೆವೊನ್ ಘೆಲಿ೦ ಜಾಯ್ಜಾಯ್ ಯಾ ಆನಿ೦ ಕಿತೆ೦ಯ್..?? ಛೇ! ಛೇ! ತಸಲೆ೦ ಚಡ್ ಉಣೆ೦ ಕಾ೦ಯ್ ಜಾ೦ವ್ಚೆನಾ ಮುಣೊನ್ ಮಾಕಾಚ್ ಸಮಾದಾನ್ ಕೆಲೆ೦. ಕೂ ಮುಣ್ ರಯ್ಲಾನ್ ಆಪ್ಣಾಚೊ ವೇಗ್ ಉಣೊ ಕೆಲೊ.. ಹಾ೦ವೆ ದೆ೦ವ್ಚೆ ತೆ೦ ಸ್ಟೇಶನ್ ಆಯಲ್ಲೆ೦. ಲಗೇಜ್ ಕಾನ್ಗೆ೦ವ್ಕ್ ದೆವೊ೦ಕ್ ಆಯ್ತೊ ಜಾಲೊ೦. ಗಾವಾಕ್ ಪಾವಲ್ಲ್ಯಾ ಸ೦ತೊಸಾನ್ ತಿ ಜೊಡಿ ಕಿತೆ೦ ಜಾಲಿ ಮುಳ್ಳೆ೦ ಕುತೂಹಲ್ ಪಯ್ಸ್ ಗೆಲ್ಲೆ೦. ಆತಾ೦ ಘರಾ ಪಾ೦ವ್ಚಿ ಉರ್ಬಾ ಮಾತ್ರ್ ಆಸಲ್ಲಿ. ಸಗ್ಳೆ೦ ವಿಸ್ರೊನ್ ಮುಕಾರ್ ದಾ೦ವ್ಚ್ಯಾ ತ್ಯಾ ರಯ್ಲಾಬರಿ ಹಾ೦ವ್ ಬಸ್ ಸ್ಟ್ಯಾ೦ಡ್ಯಾ ಕುಶಿನ್ ಮೆಟಾ ಕಾಡು೦ಕ್ ಲಾಗ್ಲೊ೦.
--
ಡೆನ್ಸು, ಹೊಸ್ಪೆಟ್
